Azərbaycan Respublikasının Prezidenti cənab İlham Əliyev deyib: “Vətən uğrunda öz canlarını fəda etmiş qəhrəman övladlarımızın ailə üzvləri dövlət tərəfindən qayğı ilə əhatə olunmalıdır və biz bunu bu gün əyani şəkildə görürük. Öz sağlamlığını itirmiş, yaralanmış qazilər bütün dövlət orqanları tərəfindən daim qayğı ilə əhatə olunmalıdır və biz bunu təmin edirik”. Bu gün muxtar respublikada şəhid ailələrinə və müharibə iştirakçılarına hərtərəfli qayğı göstərilir. Bu kateqoriyadan olan vətəndaşlar mənzil və avtomobillərlə təmin olunurlar.
Martın 15-də - İlaxır çərşənbə günü 10 şəhid ailəsinə və qaziyə mənzillər, 10 Vətən müharibəsi iştirakçısına isə avtomobillər təqdim olunub.
Naxçıvan Muxtar Respublikası Ali Məclisinin Sədri Vasif Talıbov ümummilli liderimiz Heydər Əliyevin “Azərbaycanın xoşbəxt gələcəyi Azərbaycan vətəndaşlarının Vətənə olan sevgisi, vətənpərvərliyi və millətimizin qüdrəti ilə bağlıdır”,- fikirlərini xatırladaraq deyib: İkinci Qarabağ müharibəsində Lider-xalq birliyi və igid oğullarımızın qəhrəmanlığı xalqımıza böyük Zəfər qazandırdı. Bu gün Azərbaycanda şəhid ailələrinin və müharibə iştirakçılarının sosial-məişət şəraitinin yaxşılaşdırılması istiqamətində ardıcıl tədbirlər görülür. Xalqımızın birlik və vətənpərvərliyinin ifadəsi olan Novruz bayramı ərəfəsində muxtar respublikada şəhid ailələrinin və müharibə iştirakçılarının mənzil və avtomobillərlə təmin olunması da bu tədbirlərin davamıdır.
Ali Məclisin Sədri şəhidlərimizin əziz xatirəsinə ehtiramını bildirib, şəhid ailələrini və qaziləri mənzillər və avtomobillərlə təmin olunmaları, eləcə də bütün şəhid ailələrini, veteranları qarşıdan gələn Novruz bayramı münasibətilə təbrik edib.
Naxçıvan Muxtar Respublikasının Əmək və Əhalinin Sosial Müdafiəsi naziri Nicat Babayev çıxış edərək deyib ki, muxtar respublikada İkinci Qarabağ müharibəsi şəhidlərinin ailələri və qazilərin mənzil və avtomobillərlə təminatı diqqətdə saxlanılıb, bugünkü təqdimatla birlikdə, ümumilikdə 38 şəhid ailəsi mənzillə, 38 qazi avtomobillərlə təmin olunub. Həmçinin Vətən müharibəsi qazilərindən 56-na əlillik təyinatı aparılıb, 75 ailə özünüməşğulluq proqramına cəlb edilib. Vətən müharibəsi şəhidlərinin ailə üzvləri, müharibə iştirakçıları və yaralananlar üçün yaradılan Psixoloji Dəstək Xidmətində 40-dan artıq şəxsə xidmət göstərilib. Bugünədək müvafiq kateqoriyadan olan 24 şəxsin muxtar respublika xaricində müalicə və müayinəsinə köməklik göstərilib, 19 nəfərin kredit borcları ödənilib, 32 ailənin məişət şəraiti yaxşılaşdırılıb, 1 şəhid ailəsi üzvünün təhsil xərcləri qarşılanıb. Naxçıvan Muxtar Respublikasında şəhid ailələri üzvlərinin, müharibə ilə əlaqədar xəsarət alan hərbi qulluqçuların və əlilliyi müəyyən edilmiş şəxslərin müraciətləri üzrə vahid əlaqələndirmə mərkəzlərinin fəaliyyəti nəticəsində ötən müddətdə 126 şəhidin 251 ailə üzvünə vəsiqələr verilib, 277 şəhid ailəsi üzvünə Prezident təqaüdü, 39 uşaq üçün sosial müavinət, 2 nəfərə Vətən Müharibəsi Qəhrəmanı üçün Prezident təqaüdü təyin edilib. Vətən müharibəsi iştirakçılarından 13-ü Naxçıvan Əlillərin Bərpa Mərkəzində müalicə almış, 21-nə texniki və yardımçı reabilitasiya vasitələri təqdim edilib. Nicat Babayev muxtar respublikada şəhid ailələrinə və müharibə ilə əlaqədar sağlamlıq imkanları məhdudlaşan şəxslərə göstərilən diqqət və qayğıya görə minnətdarlıq edib.
Sonra Ali Məclisin Sədri mənzillərin orderlərini və avtomobillərin açarlarını təqdim edib.
Mənzillə təmin olunan şəhid baş leytenant Zülfü Rzayevin həyat yoldaşı Gülnar Rzayeva deyib: “Həyat yoldaşım 2007-2010-cu illərdə Heydər Əliyev adına Hərbi Liseyin kursantı olub, hər zaman Ali Məclis Sədrinin liseyə göstərdiyi diqqət və qayğıdan bəhs edib. O, daha sonra təhsilini Heydər Əliyev adına Azərbaycan Ali Hərbi Məktəbində davam etdirib və 2015-ci ildə kəşfiyyatçı kimi ön xətdə xidmətə başlayıb. 2016-cı ildə düşmənin törətdiyi təxribata qarşı həyata keçirilən əməliyyatlarda fəal iştirak edib, Lələtəpə yüksəkliyinin azad olunmasında şücaət göstərib. Buna görə 2017-ci ildə Azərbaycan Respublikasının Prezidenti cənab İlham Əliyev tərəfindən “İgidliyə görə”, 2018-ci ildə “Azərbaycan Respublikası Silahlı Qüvvələrinin 100 illiyi (1918-2018)” yubiley medalı ilə təltif olunub. Xidmətdə olduğu dövrdə nümunəvi zabit kimi diplom və fəxri fərmanlara layiq görülüb. 2020-ci il sentyabrın 27-də İkinci Qarabağ müharibəsinin başlandığı ilk gündən düşmən sədlərini öz döyüş yoldaşları ilə birgə yarmış və qəhrəmancasına şəhidlik zirvəsinə ucalmışdır. Ölümündən sonra ölkə başçısı cənab ilham Əliyevin müvafiq sərəncamları ilə “Azərbaycan Bayrağı” ordeni, “Vətən uğrunda”, “Cəsur döyüşçü”, “Füzulinin azad olunmasına görə”, “Xocavəndin azad olunmasına görə” və “Şuşanın azad olunmasına görə” medalları ilə təltif olunub. Bir zamanlar sizin qarşınızda təhsildə uğur qazanmış gənc bir tələbə kimi, bu gün isə şəhidin həyat yoldaşı kimi dayanmışam. Bu, nə qədər ağır və çətin olsa da, bir o qədər fəxrli və qürurludur”. Gülnar Rzayeva göstərilən diqqət və qayğıya görə bütün şəhid ailələri adından ölkə Prezidenti və Ali Məclisin Sədrinə minnətdarlıq edib.
Ali Məclisin Sədri şəhid ailələrinə və qazilərə rahat həyat arzulayıb.
Tədbir çay süfrəsi arxasında davam edib.
Sonda xatirə şəkli çəkdirilib.
Şəhid ailələrinə və qazilərə verilən 2 və 3 otaqlı mənzillər Kəngərli rayonunun Qıvraq qəsəbəsində, Şərur, Culfa və Şahbuz şəhərlərindəki yeni yaşayış binalarında yerləşir. Tam təmir olunan mənzillərə mebel dəstləri qoyulmuş, lazımi məişət şəraiti yaradılıb.